بنگلورو 18 اکتوبر 2021 (فکروخبرنیوز/ذرائع) ریاست میں پٹرول اور ڈیزل کی قیمتیں 100 روپے سے تجاوز کرنے کے بعد وزیر اعلیٰ بسوراج بومائی نے مصیبت زدہ عوام سے وعدہ کرتے ہوئے کہا کہ ریاستی حکومت قیمتیں کرنے کے تعلق سے جلد فیصلہ کرے گی۔ تاہم وزیر اعلیٰ نے ایک انتباہ دیتے ہوئے کہا کہ کسی بھی ٹیکس میں کمی کا انحصار ریاست کی معیشت پر ہوگا، جس کا وہ 30 اکتوبر کو ہناگل اور سندھگی کے ضمنی انتخابات کے بعد جائزہ لیں گے۔ کرناٹک کے مختلف حصوں میں پٹرول کی قیمت 108 روپے سے 110 روپے کے درمیان ہے۔ پٹرول کے فی لیٹر ٹیکس جزو 59.19 روپے ہے۔ اس میں سے ریاستی حکومت 22.5 روپے، مرکز 33 روپے اور ڈیلر کمیشن 3.69 روپے لیتا ہے۔ڈیزل کے لیے ریاستی جزو 24 فیصد ہے، جو ویلیو ایڈڈ ٹیکس کے طور پر جمع کیا جاتا ہے اور 17.89 روپے فی لیٹر تک کام کرتا ہے۔ اگرچہ قیمتوں میں کمی لانے کے لیے پٹرول اور ڈیزل کو جی ایس ٹی کے تحت شامل کرنے کا مطالبہ کیا گیا ہے لیکن ریاستی حکومتیں اس کی مخالفت کرتی رہی ہیں کیونکہ وہ اپنی آمدنی کا بڑا حصہ کھو دے گی۔ کرناٹک پٹرولیم ڈیلر ایسوسی ایشن کے سابق صدر بی آر رویندر ناتھ نے کہا کہ ریاست میں 60 لاکھ لیٹر ڈیزل 5500 آؤٹ لیٹس کے ذریعے روزانہ فروخت ہوتا ہے۔ اس میں سے 25 لاکھ لیٹر صرف بنگلورو شہری اور دیہی اضلاع میں فروخت ہوتے ہیں۔