بنگلورو24 فروری 2022 (فکروخبرنیوز/ ذرائع) سپریم کورٹ کے وکیل پرشانت بھوشن نے کہا کہ ملک کو فرقہ واریت سے بچانے کے لیے سنجیدہ کوششیں کی جانی چاہئیں۔ انہوں نے سوال اٹھایا  کہ عدالتیں آخر کیوں فرقہ وارانہ طاقتوں پر لگام  نہیں لگارہی ہیں.

اانہوں نے ہندوتواتنظیموں کی طرف سے شیموگہ قتل معاملہ کو فرقہ وارانہ رنگ دینے پر کہا کہ اس طرح  قتل کے واقعہ کو فرقہ وارانہ رنگ دینا یہ بی جے پی کافارمولہ ہے جسےوہ  پہلے گجرات میں بھی آزماچکی ہے 

جسٹس لوکور نے کہا کہ ہر قتل خوفناک ہے، لیکن اس کی سیاست یا فرقہ واریت نہیں ہونی چاہیے۔ انصاف کے مفاد میں سیاسی یا فرقہ وارانہ بیانات دینے سے ماحول خراب ہو سکتا ہے اور تفتیش متاثر ہو سکتی ہے۔فرقہ واریت معاشرے کے لیے بہت بڑا خطرہ ہے۔ کرناٹک ایک غیر مستحکم ریاست بنتا جا رہا ہے اور ایسے واقعات کو فرقہ وارانہ رنگ دینے کی حوصلہ شکنی کی جانی چاہیے ورنہ ریاست نفرت کی فیکٹری میں بدل جائے گی۔ یہ سیاسی طبقے اور بیوروکریسی کا فرض ہے کہ وہ اس بات کو یقینی بنائے کہ واقعات کی سیاست نہ ہو۔

ریٹائرڈ آئی اے ایس افسر ایم جی دیواسہام نے کہا کہ نفرت انگیز ایجنڈے کو روکنا ہوگا۔ اقلیتی برادریوں کے خلاف جھوٹ بول کر ان کے خلاف نفرت انگیز ایجنڈا ابلتا رہتا ہے۔ جب پارٹیوں کے پاس کامیابیوں کے طورپر دکھانے کے لیے کچھ نہیں ہوتا تو وہ نفرت پھیلانے میں ملوث ہو جاتے ہیں۔

1981-83میں  شیموگا کے ایس پی کے عہدے پر فائز رہنے والے اجے کمار سنگھ نے چیف منسٹر بسواراج بومئی اور وزیر داخلہ آراگا جنیندر سے قانون کی حکمرانی کو برقرار رکھنے اور ہرشا کے قتل میں ملوث تمام لوگوں کو کیفرکردار تک پہنچانے کی اپیل کی۔ "انہیں ان لوگوں کے خلاف بھی کارروائی کرنی چاہیے جنہوں نے ممنوعہ احکامات کی خلاف ورزی کرتے ہوئے جلوس کو منظم کیا اور اس کی قیادت کی، اور اس کے نتیجے میں  تشدد پھوٹ پڑا۔