بیدر29؍ٖستمبر 2021(فکروخبر/سالار ہبلی) ملک کے ممتاز معروف عالم دین مولانا کلیم صدیقی کی اترپردیش اے ٹی ایس کی جاب سے بے جا گرفتاری پر مولانا محمد تصدق ندوی جنرل سکریٹری جمعیت علماء بیدر نے اپنے شدید رد عمل کا اظہار کرتے ہوئے آج ایک صحافتی بیان میں کہا ہے کہ جمعیت علماء بیدر مولانا کلیم صدیقی کی گرفتاری پر شدید مذمت کا اظہار کرتی ہے اور حکومت سے پرزور مطالبہ کرتی ہے کہ مولانا کی فوری رہائی عمل میں لائی جائے۔ مولانا تصدق ندوی نے مزید کہا کہ مولانا کلیم صدیقی ایک بے داغ شخصیت ہیں۔ ہندو مسلم بھائی چارہ کے علمبردار ہیں، اسلام کا پیغام امن پورے دیش واسیوں کو پہنچاتے ہیں جن کی عزت صرف مسلمان ہی نہیں ہندو بھائی بھی کرتے ہیں، مولانا ملت اسلامیہ کا عظیم سرمایہ ہے ، مولانا کے چاہنے والے پوری دنیا میں پھیلے ہوئے ہیں ، مولانا کی گرفتاری سے ان کی محبین میں سخت ناراضگی اور بے چینی پائی جارہی ہے ۔ مولانا نے آج تک کبھی اپنی زندگی میں قانون کی خلاف ورزی نہیں کی ہے ، مولانا نے جو بھی کام کیا ہے وہ قانون کے دائرہ میں رہتے ہوئے کیا ہے ، اس ملک میں ہر شہری کو اپنے مذہب پر چلنے اور اس کا پرچار کرنے کی مکمل آزادی حاصل ہے ۔ اس ملک میں علماء کرام کی ایک روشن تاریخ رہی ہے ملک کی تعمیر وترقی میں علماء کرام نے ہمیشہ اپنے آپ کو پیش کیا ہے اور قربانیاں دی ہیں ، اس کے باوجود علماء کرام کو شک کے دائرہ میں لاکھڑا کرنا ، علماء کرام کے تئیں نفرت وعداوت اور سوچی سمجی سازش معلوم ہوتی ہے۔ اس وقت جمیعت علماء ہند مولانا نے کی بے گناہی ثابت کرنے کے لیے عدالت میں مقدمہ کی پیروی کی جارہی ہے، اللہ کی ذات سے امید ہے کہ ان شاء اللہ بہت جلد مولانا کی بے گناہی ثابت ہوگی اور مولانا محترم باعزت بری ہوں گے ۔ ملت اسلامیہ کو اس وقت متحد ہوکر مولانا کا دفاع کرنے او رمولانا کی بے جا گرفتاری کی خلاف آواز اٹھانے کی ضرورت ہے تاکہ حکومت آئندہ کسی بھی مذہبی سرکردہ با عزت شخصیت کے ساتھ ایسی حرکت نہ کرے۔