بنگلورو06؍دسمبر2023 : کرناٹک کے وزیر اعلیٰ سدارامیا نے رائٹرایم ایم کلبرگی اور صحافی گوری لنکیش کے قتل کے مقدمات کی سماعت کو تیز کرنے کے لیے ایک خصوصی عدالت کے قیام کا حکم دیا ہے جو فرقہ پرستی اور مذہبی بنیاد پرستی کے خلاف آواز اٹھانے کے لیے معروف تھے۔

کلبرگی کو اگست 2015 میں دھارواڑ میں ان کے گھر کے باہر گولی مار کر ہلاک کر دیا گیا تھا۔ قانونی کارروائی میں مسلسل تاخیر ہوتی رہی حالانکہ چارج شیٹ 2018 میں پیش کی گئی تھی۔ سی ایم نے 2 دسمبر کو ایک حکم نامے میں کلبرگی قتل کیس کے لیے ایک خصوصی عدالت کی تشکیل کے لیے ضروری کارروائی شروع کرنے کی ہدایت کی۔

صحافتی گوری لنکیش کو 5 ستمبر 2017 کو بنگلورو میں اسی طرح قتل کیا گیا تھا۔ پولیس نے اس کیس میں ملوث ہونے کے الزام میں 18 افراد کو گرفتار کیا تھا اور ایک جامع چارج شیٹ بھی پیش کی تھی جس میں تقریباً 1200 شواہد موجود تھے۔

خصوصی تحقیقاتی ٹیم (SIT) نے 2019 میں داخل کی گئی چارج شیٹ میں کہا تھا کہ 'سناتن سنستھا'، ہندو انتہا پسند تنظیم، گوری لنکیش کے قتل کے لیے ذمہ دار ہے، اس نے مزید کہا کہ اس قتل کا تعلق دیگر کارکنوں کے قتل سے ہے۔ جیسے کلبرگی، نریندر دابھولکر اور گووند پنسارے۔ پولیس افسران نے یہ نتیجہ اخذ کیا تھا کہ قتل کے پیچھے نظریاتی محرکات پر مبنی ایک مشترکہ گروہ کا ہاتھ ہے۔

مقدمے کی سماعت جولائی 2022 میں شروع ہوئی تھی لیکن اس سلسلہ میں پیش رفت نہیں ہوسکی ۔ گوری لنکیش کی بہن کویتا لنکیش کی عرضی کے جواب میں سدارامیا نے کل وقتی جج کے ساتھ خصوصی عدالت کی تشکیل کا حکم دیا۔