بلاری7 جون 2020(فکروخبر/ذرائع)  وزیر تعلیم سریش کمار نے بتایا ہے کہ رواں سال کے ایس ایس ایل سی امتحانات کے نتائج جولائی کے آخر تک منظر عام پر آئیں گے۔  جو امتحانات کورونا وائرس پھیلنے کی وجہ سے ملتوی کردیئے گئے تھے اب وہ 25 جون سے سخت احتیاطی تدابیر کے ساتھ ہوں گے۔

وزیر نے کہا کہ ایس ایس ایل سی کے امتحانات 25 جون سے 4 جولائی تک ہورہے ہیں اور نتائج جولائی کے آخر میں یا اگست کے پہلے ہفتے میں اعلان کردیئے جائیں گے۔ ضمنی امتحانات نتائج کے اعلان کے تین ہفتوں میں ہوں گے۔ 

سریش کمار نے مزید کہا، "حکومت کی پہلی ترجیح امتحانات لکھنے کے لئے امتحانی مراکز پر پہنچنے والے طلباء کی حفاظت کو یقینی بنانا ہے، اور اعتماد کے ساتھ امتحان دینے میں ان کی مدد کرنا ہے۔ امتحان لکھنے کے دوران معاشرتی دوری لازمی ہے۔ طلباء اور بنچوں کے مابین ساڑھے تین فٹ کا فاصلہ برقرار رہے گا۔ پہلے 24 طلباء ایک کلاس روم میں بیٹھتے تھے، اب اس کی تعداد  18 کردی گئی ہے ۔ اساتذہ اور طلباء دونوں کے لئے فیس ماسک لازمی ہے۔

"اس سال 8،48،203 طلباء ایس ایس ایل سی امتحان لکھنے جارہے ہیں۔ امتحانی مرکز پر پہنچنے والے ہر طالب علم کی تھرمل اسکریننگ کی جائے گی ۔ اگر کسی بھی طالب علم کو بخار پایا جاتا ہے تو اسے الگ کمرے میں امتحان لکھنے کے لئے انتظام کیا جائے گا۔

"طلبا میں اعتماد پیدا کرنے کے لئے کنڑا اور انگریزی میں  ڈی ڈی چندنا چینل پر تمام مضامین کے لئے آن لائن کلاسز کا انعقاد کیا گیا ہے۔ اس کے علاوہ، آن لائن نظرثانی کی کلاسز بھی 10 سے 20 جون تک منعقد ہوں گی۔

انہوں نے مزید کہا کہ لاک ڈاؤن کی وجہ سے طلباء ہاسٹل میں مقیم اپنے آبائی مقامات پر اپنے اپنے گھروں میں چلے گئے ہیں۔ مزید برآں، ہاسٹل قرنطین مراکز میں تبدیل کردیئے گئے ہیں۔ ان حالات میں جو طلبا اپنے گھروں کو چلے گئے ہیں وہیں پر ان کے لئے امتحان لکھنے کے انتظامات کئے جارہے ہیں۔