بنگلورو 26 دسمبر2021) فکرو خبر نیوز/ذرائع)  کووڈ-19  Omicron کے معاملات میں اضافہ اور وزیر اعظم نریندر مودی کے ذریعہ کرسمس کی رات قوم سے اپنے خصوصی ٹی وی خطاب میں لوگوں سے احتیاطی تدابیر اختیار کی اپیل کے درمیان ریاستی حکومت کی اعلی سطحی میٹنگ آج صبح منعقد ہوئی۔  وزیر اعلیٰ کی زیر صدارت اس خصوصی میٹنگ میں بسواراج بومائی نے کرناٹک بھر میں منگل،28 دسمبر رات 10 بجے سے 7 جنوری کی صبح 5 بجے تک 10 دنوں کے لیے رات کا کرفیو دوبارہ نافذ کرنے کا فیصلہ کیا ہے۔ تمام ریستورانوں، ہوٹلوں، پبوں اور کلبوں کو ہدایت کی گئی ہے کہ وہ 30 دسمبر سے 2 جنوری تک کووڈ کے تمام اصولوں جیسے سماجی دوری، ماسک پہننے اور صفائی ستھرائی کے اصولوں پر عمل کرتے ہوئے اپنی صلاحیت کے صرف 50 فیصد پر کام کریں۔ آر ٹی پی سی آر ٹیسٹنگ کے بعد اداروں کے پاس کوویڈ منفی سرٹیفکیٹ ہونا ضروری ہے اور انہیں ویکسین کی دو خوراکیں حاصل کرنی ہوں گی۔ مزید شادیوں، کانفرنسوں سمیت عوامی اجتماعات کو 28 دسمبر کے بعد سے زیادہ سے زیادہ 300 افراد تک محدود کر دیا گیا ہے۔ جس میں کوویڈ اصولوں کی سختی سے پابندی کرنے کی بات کہی گئی ہے۔ پابندی کی ذمہ داری منتظمین یا میزبانوں پر ہوگی۔ 
کیرالہ اور مہاراشٹر جیسی پڑوسی ریاستوں سے آنے والے مسافروں پر سخت نگرانی رکھی جائے گی۔ میٹنگ میں وزیر صحت اور خاندانی بہبود ڈاکٹر کے سدھاکر، وزیر ریونیو آر اشوک، وزیر داخلہ اراگا جنیندر، چیف سکریٹری پی روی کمار اور دیگر سینئر افسران نے شرکت کی۔ 
کرناٹک میں ہفتہ 25 دسمبر کو اومیکرون ویرینٹ کے سات نئے کیس رپورٹ ہوئے، جس سے اب اس کی کل تعداد 38 ہوگئی ہے۔