بنگلورو 06جولائی2022(فکروخبرنیوز/ذرائع) کرناٹک کے اضلاع خاص طور پر ساحلی علاقوں میں بدھ کو بھی لگاتاربھاری بارش جاری رہی۔

چیف منسٹر بسواراج بومئی نے بدھ کو اعلان کیا کہ انہوں نے حکام کو ہدایت دی ہے کہ وہ ان علاقوں میں فوری امدادی اقدامات کریں جہاں بارش نے تباہی مچا دی ہے۔

بارش سے کئی علاقوں میں نقصان ہوا ہے۔ بومائی نے کہا کہ میں نے متعلقہ ڈی سی سے بات کی ہے اور ان سے ضروری امدادی اقدامات کرنے کو کہا ہے۔

بارش نے دکشنا کنڑ، اترا کنڑ، کوڈاگو، بیلگاوی، ہبلی، شیوموگا، چکمگلورو اور ریاست کے دیگر اضلاع کو متاثر کیا ہے۔ جنوبی کنڑ ضلع کے منگلورو بین الاقوامی ہوائی اڈے پر بین الاقوامی پروازوں کی آمد میں خلل پڑا ہے۔

ان اضلاع میں زندگی بری طرح متاثر ہوئی ہے۔ سیلاب اور مسلسل بارشوں کی وجہ سے لینڈ سلائیڈنگ کی اطلاع ملی ہے اور کئی مقامات پر سڑکیں بہہ گئی ہیں۔

حکام نے ریاست کے سات اضلاع میں اسکولوں، کالجوں اور تمام تعلیمی اداروں میں تعطیل کا اعلان کیا ہے۔ اترکنڑا اور جنوبی کنڑا میں مزید دو دن بارش کی وجہ سے اورنج الرٹ جاری کر دیا گیا ہے۔

ریاست میں کئی ندیاں خطرے کی سطح کو عبور کر چکی ہیں اورکھیت پانی سے ڈوب گئے ہیں۔ پہلی جماعت کی طالبہ کی لاش کی تلاش کے لیے سرچ آپریشن دوسرے روز بھی جاری رہا۔ یہ لڑکی پیر کو اس وقت سیلاب میں بہہ گئی جب وہ اپنے بڑے بھائی اور دوستوں کے ساتھ چکمگلور ضلع کے ٹھوگاری ہانکل گرام پنچایت حدود میں اسکول سے گھر لوٹ رہی تھی۔