شیواموگہ 12 جون 2021(فکروخبرنیوز) اپنے آبائی وطن شکاری پور میں صحافیوں سے بات چیت کرتے ہوئے کرناٹک کے وزیر اعلیٰ نے ایک اور مالی پیکیج کے اعلان کا اشارہ دیا ہے۔ انہوں نے امید ظاہر کی ہے کہ جلد ہی کورونا کی مثبت شرح کم سے کم ہوجائے گی ۔ انہوں نے کہا کہ ریاست کے کچھ اضلاع کے ساتھ ساتھ  شیواموگہ اور شکاری پورمیں کوویڈ انفیکشن کی شرح زیادہ ہے۔ میں نے متعلقہ عہدیداروں کو ہدایت کی ہے کہ وہ اسے کم کرنے کے لئے اقدامات کریں۔ مجھے یقین ہے کہ اگر لوگوں نے تعاون کیا تو مثبت شرح پانچ فیصد تک کم ہوجائے گی۔ ٹیکس جمع نہ کرنے کی وجہ سے سرکاری خزانے کا محصول آٹھ ماہ سے کم ہے۔ اس کے درمیان  تمام تر کوششیں کی جارہی  ہیں تاکہ ترقیاتی کاموں کے لئے فنڈز کی کمی نہ ہو۔ مزید امداد کے لئے مرکزی حکومت سے اپیل کی گئی ہے۔ چار ماہ کے بعد ریاست کی معاشی صورتحال بہتر ہوگی۔ ریاستی حکومت کے اعلان کردہ دو پیکجوں میں پہلے ہی کچھ طبقے کے لوگوں کو کوویڈ معاوضہ مل چکا ہے۔ اگر یہ ناگزیر ہے تو ایک اور پیکیج کا اعلان کیا جائے گا۔

انہوں نے مزید کہا کہ اگلے دو دن میں ریاست کو ویکسین بڑی مقدار میں ملنے والی ہے۔ ہر ضلع کو آبادی کے مطابق مطلوبہ ویکسین ملیں گی۔ بین الاقوامی مارکیٹ میں پٹرولیم مصنوعات کی قیمتوں میں اضافہ ہوا ہے اور اسی وجہ سے ایندھن کی شرح میں اضافہ کیا گیا ہے۔ کسی کو بھی اس مرحلے پر سیاست نہیں کرنا چاہئے اور حکومت سے تعاون کرنا چاہئے۔