بنگلورو30اپریل 2020(فکروخبرنیوز/ ذرائع) لاک ڈاؤن کی وجہ سے مختلف ملکوں میں پھنسے  کرناٹک سے تعلق رکھنے والے 11000 افراد کو ریاستی حکومت نے 3 مئی کے بعد واپس لانے کا فیصلہ کیا ہے جن میں سیاح بھی شامل ہیں۔

مرکزی حکومت نے بیرون ملک مقیم مختلف مراکز سے ہندوستان واپس آنے کے منتظر ہندوستانیوں کو واپس لانے کے لئے اقدامات کئے ہیں۔ ایک اندازے کے مطابق کرناٹک کے 10،823 افراد بھی وطن واپس آنے کے خواہاں ہیں۔ پہلے مرحلے میں 6،100 افراد کو واپس لایا جائے گا۔ بحری جہازوں کے علاوہ ہندوستانی بحریہ کے جہازوں کو بھی اس کے لئے استعمال کئے جانے کا امکان ہے کیونکہ سفر کے دوران معاشرتی فاصلوں کو برقرار رکھنا پڑے گا۔

وزیر سریش کمار سعودی عرب، انگلینڈ، کینیڈا وغیرہ میں کرناٹکا سے تعلق رکھنے والے افراد کو واپس لانا چاہتے ہیں، وزیر سریش کمار نے کہا کہ واپس آنے سے پہلے اور یہاں پہنچنے کے بعد ان کی صحت کی جانچ کی جائے گی۔ انہیں یہاں 14 دن تک قرنطین سے بھی گزرنا پڑے گا۔

وزیر موصوف نے واضح کیا کہ واپس آنے والوں کی فہرست میں 4،408 سیاح، 3،074 طلباء اور 2،284 پیشہ ور افراد شامل ہیں۔ بنیادی طور پر، کینیڈا (328)، امریکہ (927) اور خلیجی ممالک میں پھنسے ہوئے لوگوں کی ہوائی اڈوں پر اسکریننگ کی جائے گی ۔ انہوں نے مزید کہا کہ  انہیں مناسب علاج مہیا کیا جائے گا۔ انہوں نے یہ بھی کہا کہ کرناٹک نے ہندوستان کی دیگر ریاستوں میں  پھنسے افراد کو واپس لانے کے لئے بھی تیاریاں شروع کردیں ہیں۔