بھٹکل 04؍مارچ 2021(فکروخبرنیوز) جنوبی ہند کی مشہور دینی درسگاہ جامعہ اسلامیہ بھٹکل سے ہر سال ایک بڑی تعداد عالمیت کی تکمیل کے بعد فراغت حاصل کرتی ہے ۔ امسال 96 طلباء عالمیت کی تکمیل کررہے ہیں جن کے اعزاز میں الوداعی جلسہ منعقد کیا گیا۔ طلباء کی تعداد کو دیکھتے ہوئے اس پورے پروگرام کو تین نشستوں میں منعقد کیا گیا تھا، پہلی نشست کل بروز بدھ بعد عصر منعقد ہوئی جو مغرب تک چلی ، دوسری نشست کا آغاز بعد عشاء کیا گیا او ریہ نشست رات بارہ بجے تک چلی ۔ اس الوداعی تقریب کی تیسری اور آخری نشست آج 20 رجب المرجب 1442ھ مطابق 4 مارچ  2021ء بروز جمعرات صبح نو بجے منعقد ہوئی، جس کا آغاز عزیزم حافظ قتادہ رکن الدین کی تلاوت  سے ہوا۔

تینوں نشستوں میں طلبہ نے اپنے تاثرات میں ان محسنین و معاونین کے احسانات کو یاد کرکے مشکور تھے جنھوں نے اس تعلیمی سفر میں ان کی ہر طرح سے رہنمائی کی، اور اپنے مرحوم رہبروں کا تذکرہ کرکے انھیں خراج عقیدت پیش کررہے تھے۔

فارغین نے ایک طرف اپنے جامعہ سے استفادہ کی مختلف شکلوں اور کیفیات کو بیان کیا تو دوسری طرف جامعہ کی طرف سے عطا کردہ سہولیات سے بھرپور فائدہ نہ اٹھانے پر افسوس کا بھی اظہار کیا، اپنے اساتذہ و نگراں کی محنتوں کو سراہتے ہوئے ان کے حق میں دعائے خیر کے ساتھ ہی بانیان جامعہ، اور محبان جامعہ کی تگ و دو پر شکر بجالاتے ہوئے جامعہ کی ترقی اور نیک نامی کی دعا کرتے چلے۔

کل بعد عشاء منعقدہ نشست میں امسال حفظِ قرآن کی تکمیل کرنے والے طلباء کا ختم استاد دار العلوم ندوۃ العلماء لکھنو مولانا عبدالرشید صاحب ندوی نے کیا اور اس کے بعد قرآن کا پیغام عام کرنے اور اس کو اپنے سینے میں محفوظ رکھ کر اس کے احکامات پر عمل کرنےکی نصیحت بھی گیا۔

آخری نشست میں عزیزم احمد یسع  مہمانوں کے حضور کلمات استقبالیہ پیش کرتے ہوئے اس بات کی طرف توجہ دلائی کہ ان طلبہ کے احساسات کو قصہ گوئی نہ سمجھیں بلکہ ان کے اہم اور مفید پہلوؤں پر غور کرتے ہوئے عمل میں لانے کی فکر کریں۔

طلبہ نے اپنی زندگی کی روداد میں اپنے بچپن کی اٹھکیلیوں سے لے کر جوانی کی مشقتوں کا تذکرہ کیا اور اپنے سکھ دکھ کے حالات کو بیان کرتے ہوئے مادر علمی سے حاصل شدہ فوائد کو سامعین کے گوش گزار کیا اور اپنے عزائم اور حوصلوں کا ذکر کرتے ہوئے گویا ہوئے

ہم نہ چھوڑیں گے کبھی جہد  مسلسل کی عناں               قافلے پائیں گے ہم سے اپنی منزل کا نشاں

طلبہ نے دارالعلوم، دارالاقامۃ، دارالکتب، کتب خانہ اور لجنہ کی افادیت پر روشنی ڈالی  اور جامعہ کے در و دیوار سے اپنا ربط قائم رکھنے کی تلقین کرتے رہے۔ یہاں کے اساتذہ کی نمایاں صفات، جمال تکلم، تواضع و انکساری اور محبت کا  ذکر کرتے ہوئے چمن کی آبیاری میں مہتمم جامعہ، سابق صدر جامعہ مولانا اقبال صاحب ملا ندوی اور سابق مہتمم جامعہ مولانا عبدالباری صاحب فکردے ندوی علیھم الرحمۃ کی خدمات کی سراہنا کرتے ہوئے ان کا خصوصی شکریہ ادا کیا اور  مرحومین کیلیے دعائے مغفرت کی۔

اس موقع پر عالیہ ثالثہ کی طرف سے عزیزم رویض عیدروسہ نے فارغین کو الوداعی پیغام میں زمانہ کے حملوں اور مصائب سے نہ گھبرانے اور ڈٹ کر ان کا مقابلہ کرنے کی وصیت کی، ساتھ ہی حضرت مولانا علی میاں رحمۃ اللہ علیہ کا الوداعی پیغام سنا کر فارغین کو جھنجھوڑ کر کہا کہ

بڑھو آگے ابھی تاریکیوں میں شمع حق لے کر                           چلو تم نرم گفتاری کی خُو  حق کا سبق لے کر

زمانہ لاکھ برہم ہو مگر سچ بولنا ہوگا                                       ڈرائے گا زمانہ پر تمہیں لب کھولنا ہوگا

فراست کی چمک سے دل سدا آباد رکھنا ہے                                تو حکمت کے بھی موتی اپنے ہونٹوں پر سجانا ہے

اس کے ساتھ اخلاص، جذبہ قربانی، جوہر ذاتی اور اتحاد و اتفاق  کی طرف توجہ دلائی اور مادیت پرستی میں گھری انسانیت کو توحید کا جام پلانے پر زور دیا۔

ملحوظ رہے کہ اس تقریب کے دوران عزیزی دانش شنگیٹی نے مولانا سمعان خلیفہ ندوی کی لکھی ہوئی نظم فارغین کے احساسات کی ترجمانی کو بہت ہی خوبصورت انداز میں پیش کیا، جب کہ عبداللہ عتبان شریف نے فارغین کے لیے تیار کردہ مولوی سالک برماور ندوی کی الوداعی نظم سنا کر اپنی خوش گلو آواز سے سامعین کو محظوظ کیا۔

یاد رہے کہ امسال ناگفتہ بہ حالات کے پیش نظر علیا اولیٰ (فضیلت اول) کا درجہ جامعہ ہی میں رکھا گیا تھا جس میں خصوصاً استاد دارالعلوم ندوۃ العلماء مولانا عبدالرشید صاحب راجستھانی ندوی اپنی تعلیمی خدمات انجام دے رہے تھے، ان طلبہ کی نمائندگی کرتے ہوئے مولوی انظر گوائی نے اپنے تاثرات کا اظہار کیا اور جامعہ کی ان سہولیات پر شکریہ ادا کرتے ہوئے نیک خواہشات کا اظہار کیا۔

اس جلسہ کی نظامت سلمان کولا، عبدالبر صدیقی، ابوالحسن مولوی اور سہل کولا نے بحسن و خوبی انجام دی، نیز عبدالبر صدیقی نے عالیہ ثالثہ کی طرف سے تمام مہمانان، فارغین و سرپرستان، اساتذہ و ذمہ داران اور جلسہ میں شریک علماء و عمائدین و عوام کا تہہ دل سے شکریہ ادا کیا۔

اس موقع پر مہتمم جامعہ مولانا مقبول احمد کوبٹے ندوی نے تمام فارغین اور ان کے سرپرستان کو دلی مبارکباد پیش کی اور فارغین کے علی رووس الاشھاد کیے گئے وعدوں پر قائم رہنے کی تاکید کی۔ بطور خاص سابق صدر جامعہ اور سابق مہتمم جامعہ کا ذکر کرتے ہوئے ایسی نشستوں میں ان کی شرکت اور ہمت افزا کلمات کو یاد کیا۔

اخیر میں سابق مہتمم جامعہ مولانا محمد فاروق صاحب قاضی ندوی نے اس جلسہ کے متعلق اپنے خیالات کا اظہار فرمایا اور دعا پر الوداعی تقریب کا اختتام کیا۔

اس جلسہ میں صدر جامعہ مولانا عبدالعلیم صاحب قاسمی، ناظم جامعہ جناب شہ بندری محمد شفیع صاحب، نائب ناظم جامعہ مولانا طلحہ صاحب رکن الدین ندوی، ذمہ داران جامعہ، مہتمم جامعہ و اساتذہ کرام کے علاوہ سرپرستان فارغین اور شہر و اطراف سے تشریف لائے علماء و عمائدین کی کثیر تعداد شریک رہی۔

اللہ تعالیٰ جامعہ کے بانیان، ذمہ داران، اساتذہ، محسنین، محبین اور خادمین کی خدمات کو قبول فرمائے، اس کی بہترین جزا عطا فرمائے، مرحومین کی بال بال مغفرت فرمائے اور جامعہ کو مزید ترقیات سے نوازے۔ آمین

 علاقات عامہ  جامعہ اسلامیہ بھٹکل کے  ان پٹ کے ساتھ