بارہ سالہ عبدالمحیط نے ڈھائی سال میں مکمل قُرآنِ مجید حفظ کیا

آج الحاج محمد عبدالمجید کے فرزند عبدالمحیط بعمر12 سال نے ڈھائی سال میں مکمل قُرآنِ مجید حفظ کیا ہے ۔انھوں نے قُرآنِ مجید حفظ کرنے کے بعد آج ایک دن میں مکمل قُرآنِ مجید سنانے کی سعادت حاصل کی ۔ جناب عبدالمحیط نے صحافیوں کو بتایا کہ وہ شاہین حفظ الُقُرآن میں قُرآن مجید حفظ کرنے کیلئے داخلہ لیا تھا یہاں کے شفیق اساتذہ کرام مولانا مقیم قاسمی اورحافظ عمران خیری کی نگرانی میں مکمل قُرآن مجید حفظ کیا ۔ان ڈھائی سال میں میں نے پوری دلچسپی اور جستجو کے ساتھ قُرآن مجید کی تعلیم حاصل کی ۔اور میں مستقبل ایک حافظ قُرآن کے ساتھ ساتھ ایک اچھا آئی اے ایس آفیسربن کر ملک کے انتظامیہ کو پوری ذمہ داری کے ساتھ چلانے کا عزم رکھتاہوں ۔اس موقع پر ڈاکٹر عبدالقدیر سکریٹری نے بتایا کہ مکمل قُرآنِ مجید حفظ کرنے والے 12تا15سال کی عمر کے حافظ قُرآن طلباء کو شاہین ادارہ جات کی جانب سے منفرد کورس ’’شاہین حفظ القرآن پلس کورس‘‘ کے ذریعہ حفاظ کرام کاامیج بدلنے کی ہماری اپنی سی کوشش ہے جس کے ذریعہ ہم چاہتے ہیں ماضی کاوہ دور لوٹ آئے جب علماء مختلف میدانوں میں قیادت کا فریضہ انجام دیتے تھے ۔ انھو ں نے کہا کہ شاہین ادارہ جات کی جانب سے گزشتہ 3سال قبل حفظ القُرآن پلس کورس خالص حفاظ کیلئے شروع کیا گیا ہے ۔ الحمد اُللہ اس کے بہتر نتائج آرہے ہیں ۔یہ 4سالہ انٹی گریٹیڈ کورس ہے ۔ اس کورس کے ذریعہ مکمل قُرآنِ مجید حفظ کرنے والے طلباء کو عصری تعلیم سے آراستہ کیا جاتا ہے ۔12 تا15سال کے حفاظ طلباء کیلئے خصوصی طورپر یہ کورس شروع کیا گیا ہے ۔4 سالہ اس کورس کو 4مرحلوں میں تقسیم کیا گیا ہے ۔ پہلا مرحلہ 6ماہ کا فاؤنڈیشن کورس‘ دوسرا مرحلہ 6ماہ کا بریج کورس ‘تیسرا مرحلہ جماعت دہم‘ اور چوتھا مرحلہ پی یو سی سائنس (12 ویں)پر مشتمل ہے۔ اس کورس کے ذریعہ حفاظ طلباء ڈاکٹر ‘انجینئر‘ پروفیسر ‘سائنسدان ‘ منیجمنٹ گرایجویٹ اور دیگر کورسیس و مسابقتی امتحانات IIT,NEETوغیرہ کے ذریعہ داخلہ لے سکتے ہیں ۔ انھوں نے ہندوستان بھرکے ایسے ادارے جو حفاظ کرام کوعصری تعلیم سے لیس دیکھنا چاہتے ہیں ان سے اپیل کی کہ وہ عصری تعلیم سے نابلد حفاظ کومعیاری تعلیم دے کران کے امیج کوبدلیں ۔ انھوں نے کہا کہ ایک بہترین حافظ ایک بہترین ڈاکٹر ہو‘ اور ایک بہترین انجینئر بھی اور پروفیسر و چارٹیڈ اکاؤنٹنٹ بھی ہو ‘اس مقصد کو حاصل کرنے کیلئے یہ ایک پیش رفت ہے۔فی الحال ہمارے پاس جو طلباء ہیں ان کاتعلق مغربی بنگال، دہلی، ہریانہ ، بہار ، اترپردیش ، مدھیہ پردیش ، اتراآنچل کے علاوہ جنوبی ہند میں کیرالہ ، ٹمل ناڈو اور تلنگانہ و آندھر اسے ہے۔ڈاکٹر عبدالقدیر نے حفظ القرآن پلس کو مکمل طورپر اپناآئیڈیا قرار دیتے ہوئے اس امید کا اظہار کیاکہ اس کورس سے استفادہ کرنے کے نتیجے میں مسلمانوں کے حفاظ طبقہ کی تعلیمی اور معاشی پسماندگی دور ہوگی ۔ وہ ملی لحاظ سے بھی ملکی سطح پر نمایاں ہوں گے۔ انھوں نے علماء کرام سے خواہش کی ہے کہ اس کورس کو دنیا کے کونے کونے میں پھیلائیں اور ائمہ و خطیب حضرات مساجد میں نمازِ جمعہ کے موقع پر اس کا اعلان کرسکتے ہیں اور دینی مدارس کے ذمہ داراوں اور حفاظ ا س کورس سے متعلق تعاون کرسکتے ہیں ۔ڈاکٹر عبدالقدیر سکریٹری شاہین ادارہ جات نے کہا کہ آئندہ ملک گیر پیمانے پر عالم پلس کورس شروع کرنے جارہے ہیں جس میں علماء کو عصری تعلیمی میدان میں نمایاں طورپر پیش کرنا ہے۔جس کیلئے تیاریاں جاری ہیں ۔شاہین حفظ القُرآن پلس کورس میں داخلہ جاری ہیں ۔مزید تفصیلات کیلئے www.shaheengroup.orgیا موبائیل نمبر9341111560پر رابطہ کیا جاسکتا ہے ۔ا س موقع پر الحاج محمد حبیب الدین کنٹراکٹر‘محمد ‘مولانا مقیم قاسمی ‘ حافظ عمران خیری و معزز شہریان کے علاوہ طلباء کی تعداد موجود تھی۔مولانا مفتی غلام یزدانی اشاعتی خطیبِ جامع مسجد کی نے اس کم عمر حافظ قُرآن کی حوصلہ افزائی فرماکر ان کے والد الحاج محمد عبدالمجید واسودتا سمنٹ ڈیلر کو مبارکباد پیش کی اور مولانا کی دعا پر اس پروگرام کا اختتام عمل میں آیا۔***