بنگلورو میں کل ہند جشن اردو، بھٹکل کے دو صحافیوں کو ایوارڈ

بنگلورو:04جولائی2019(فکروخبر/ذرائع)کرناٹکا اردو اکیڈمی کی جانب سے ایک عظیم الشان دو روزہ جشن اردو کا انعقاد کیا گیا۔کرناٹکا کے امبیڈگر بھون میں منعقد جشن اردو میں معروف شعرا نے شرکت کی اور سامعین کو اپنے کلام سے محسور کیا۔

واضح رہے کہ اردو اکیڈمی کی جانب سے امسال جامعہ اسلامیہ بھٹکل کے دو فارغین اور بھٹکل کے ایک صحافی کو اردو کو فروغ دینے پر ایوارڈ سے نوازا گیا ، جس میں ماہنامہ پھول کے ایڈیٹر مولوی عبداللہ دامدا ابو ، اورمہتمم  جامعہ مدینۃ العلوم شکاری پور مولانا اظہر ندوی اور بھٹکل نیوز آن لائن اردو نیوز پورٹل کے ایڈیٹر جناب عتیق الرحمن شاہ بندری صاحب کا نام بھی شامل ہے۔

ملحوظ رہے کہ اس طرح کا ایوارڈ 2012 میں جامعہ اسلامیہ بھٹکل سے نکلنے والے ارمغان حجاز اور 2009 میں بھٹکل کے مشہور عالم دین صدر ادارہ فکر وخبر بھٹکل اور جنرل سکریٹری مولانا ابو الحسن علی ندوی اسلامک اکیڈمی بھٹکل مولانا محمد الیاس صاحب ندوی کو بھی اس اعزاز سے نوازا جاچکا ہے۔

مشاعرہ میں شمالی بھارت سے تشریف لانے والے شعراء حضرات میں کلیم ثمر بدایونی، سندر مالیگانوی، عرفان رائچوری، احمد علوی دہلی، اقبال فردوسی دہلی، سراج شالاپوری و دیگر اہم شعراء نے اپنا کلام پیش کیا۔بھارت کے جنوبی شہر بنگلورو میں کرناٹکا اردو اکیڈمی کی جانب سے ایک عظیم الشان دو روزہ جشن اردو کا انعقاد کیا گیا۔

کرناٹکا اردو اکیڈمی کی جانب سے گزشتہ دو برسوں سے چیئرمین مبین منور کی سرپرستی میں 50 سے زائد پروگرامز منعقد کرائے گئے، ان میں 'اردو سیکھو اور سکھاؤ' مہم بھی ہے، جس کا اردو کو فروغ دینا تھا۔

اردو اکیڈمی کی جانب سے منعقدہ اس دو روزہ جشن اردو پروگرام کے اول روز کل 65 کتب کا اجراء کیا گیا اور مصنفین کو ایوارڈز کے ساتھ 25 ہزار روپے کے چیک بھی تقسیم دیے گئے اور ساتھ ہی ہر برس کی طرح رواں برس بھی تمام مصنفین حضرات کو 10 ہزار روپیوں کی رایلٹی بھی دی گئی۔ اکیڈمی کے چیئرمین کے مطابق تمام کتب کی طبع کے اخراجات اکیڈمی نے اٹھائے۔

مشاعرہ کی نظامت کرناٹکا اردو اکیڈمی کے رکن شفیق عابدی نے کی اور پروگرام میں شہر کی کئی معروف شخصیات نے بھی شرکت کی۔