بنگلورو 25 اگست 2022(فکروخبرنیوز/ذرائع) کرناٹک میں حکمراں بی جے پی بنگلورو کے چامراج پیٹ علاقے میں متنازعہ عیدگاہ میدان میں گنیش تہوار منانے کے ہندوتوا کارکنوں کے مطالبے کے معاملہ  پر محتاط انداز میں چل رہی ہے۔

وزیر ریونیو آر اشوک نے جمعرات کو کہا کہ عیدگاہ میدان میں گنیش تہوار منانے کے بارے میں فیصلہ کیا جائے گا۔

"ہم افسران کے ساتھ بات چیت کریں گے۔ امن و امان کو برقرار رکھنا بہت ضروری ہے۔ محکمہ پولیس اور بروہت بنگلورو مہانگرا پالیکے (BBMP) کے افسران اس سلسلے میں ایک میٹنگ کر رہے ہیں۔"

وزیر نے اس بات کا اعادہ کیا کہ امن و امان کو برقرار رکھنا ضروری ہے اور ضلع کمشنر جشن کے حوالے سے ان کو دی گئی عرضداشتوں پر فیصلہ کریں گے۔

انہوں نے کہا کہ میں گنیش تہوار منانے پر سنجیدگی سے غور کر رہا ہوں، لیکن کوئی فیصلہ نہیں کیا گیا ہے۔

انہوں نے کہا کہ ہم نے 15 اگست کو بغیر کسی الجھن کے صورتحال کو سنبھالا۔ ہم جانتے ہیں کہ صورتحال سے کیسے نمٹا جائے۔ انہوں نے مزید کہا کہ وہ گنیش تہوار کے جشن کے لئے بی جے پی کے قومی جنرل سکریٹری سی ٹی روی کے لکھے گئے خط سے واقف نہیں ہیں۔

دریں اثنا وقف بورڈ نے بی بی ایم پی کے جائیداد کے حقوق محکمہ ریونیو کو سونپنے کے فیصلے کو چیلنج کرتے ہوئے ہائی کورٹ سے رجوع کیا ہے۔